வீட்டிற்கு வந்த அதிசய விருந்தாளிக்கு வயது 100!

நவம்பர் – 21: உலகத் தொலைக்காட்சி தினம் : 

மனிதகுலத்தின் தகவல் தொடர்பு வரலாற்றில் அச்சு இயந்திரத்தின் கண்டுபிடிப்புக்குப் பிறகு மிகப்பெரிய புரட்சியை ஏற்படுத்தியது தொலைக்காட்சி.

1926-ம் ஆண்டு ஸ்காட்லாந்து பொறியாளர் ஜான் லோகி பேர்ட் (John Logie Baird) அவர்களால் உலகத்திற்கு அறிமுகப்படுத்தப்பட்ட இந்த ‘அதிசயப் பெட்டி’, சரியாக நூறு ஆண்டுகளைக் கடந்து 2026-ம் ஆண்டில் தனது நூற்றாண்டு விழாவைக் கொண்டாடுகிறது.

ஒரு சோதனை முயற்சியாகத் தொடங்கிய இக்கருவி, இன்று நமது வரவேற்பறைகளின் ஒரு அங்கமாக மட்டுமல்லாமல், உலக நிகழ்வுகளை நம் கண்முன் கொண்டு வந்து நிறுத்தும் சாதனமாக மாறியுள்ளது.

தொலைக்காட்சி வரலாற்றுப் பின்னணியும் ஐ.நா. அறிவிப்பும்:

1996-ஆம் ஆண்டு நவம்பர் 21 மற்றும் 22 ஆகிய தேதிகளில், ஐக்கிய நாடுகள் சபை (UN) முதன்முறையாக ‘உலகத் தொலைக்காட்சி மன்றத்தை’ (World Television Forum) ஏற்பாடு செய்தது.

மாறிவரும் உலகில் தொலைக்காட்சியின் முக்கியத்துவம், முடிவெடுக்கும் திறனில் அதன் பங்கு மற்றும் சர்வதேச அளவில் அது ஏற்படுத்தும் தாக்கம் குறித்து இதில் விரிவாக பேசப்பட்டது.

இதன் தொடர்ச்சியாக, 1996 டிசம்பர் 17 அன்று ஐ.நா. பொதுச் சபை நிறைவேற்றிய தீர்மானத்தின்படி, ஒவ்வொரு ஆண்டும் நவம்பர் 21-ம் தேதி உலகத் தொலைக்காட்சி தினமாக அதிகாரப்பூர்வமாக அறிவிக்கப்பட்டது.

அமைதி, பாதுகாப்பு மற்றும் சமூக-பொருளாதார வளர்ச்சியில் கவனம் செலுத்தும் நிகழ்ச்சிகளை ஊக்குவிப்பதே இதன் முதன்மை நோக்கமாகும்.

தொலைக்காட்சிப் பரிணாமம்:

இந்தியாவில் தொலைக்காட்சி ஒளிபரப்பு 1959 செப்டம்பர் 15 அன்று டெல்லியில் சோதனை அடிப்படையில் முதன் முதலில் தொடங்கியது.

1965-ல் தினசரி ஒளிபரப்பாக மாறிய இது, 1976-ல் ‘தூர்தர்ஷன்’ (Doordarshan) எனத் தனி அமைப்பாக உருவெடுத்தது.

1982 ஆசிய விளையாட்டுப் போட்டிகளின் போது இந்தியாவில் வண்ணத் தொலைக்காட்சி (Colour TV) அறிமுகமானது.

தமிழகத்தைப் பொறுத்தவரை, 1975 ஆகஸ்ட் 15 அன்று சென்னை தொலைக்காட்சி நிலையம் தொடங்கப்பட்டது.

‘ஒளியும் ஒலியும்’, ‘வயலும் வாழ்வும்’ போன்ற நிகழ்ச்சிகள் கிராமப்புறங்கள் பட்டி, தொட்டி வரை இது சென்றடைந்தன.

1990-களின் தொடக்கத்தில் தனியார் செயற்கைக்கோள் அலைவரிசைகளின் (Satellite Channels) வருகை தமிழ் ஊடகத் துறையில் மிகப்பெரிய மாற்றத்தை ஏற்படுத்தியது.

24 மணி நேரச் செய்தி அலைவரிசைகள், காமெடி, குழந்தைகளுக்கென தனிச் சேனல், நேரலை விவாதங்கள் எனத் தமிழகத்தின் அரசியல் மற்றும் சமூக உரையாடல்களைத் தீர்மானிக்கும் சக்தியாகத் தொலைக்காட்சி மாறியது.

தொலைக்காட்சி என்பது வெறும் பொழுதுபோக்குச் சாதனம் மட்டுமல்ல; அது சமூக மாற்றத்திற்கான ஒரு வலிமையான கருவியாகும்.

உடனடித் தகவல் பரவல்:

உலகின் எந்த மூலையில் நடக்கும் சம்பவங்களும், அரசியல், பொருளாதார, அறிவியல் மற்றும் விளையாட்டு நிகழ்வுகளையும் நேரலையாக (Live) உடனுக்குடன் மக்களிடம் கொண்டு சேர்க்கிறது.

கல்வி மற்றும் பேரிடர் விழிப்புணர்வு:

புயல், வெள்ளம் போன்ற பேரிடர் காலங்களில் அரசின் எச்சரிக்கைகளைக் கடைக்கோடி மக்களுக்கும் கொண்டு சேர்ப்பதிலும், சுகாதாரம் மற்றும் கல்வி சார்ந்த விழிப்புணர்வை ஏற்படுத்துவதிலும் இது முக்கியப் பங்காற்றுகிறது.

ஜனநாயகத்தின் நான்காவது தூண்:

ஆட்சியாளர்களுக்கும் மக்களுக்கும் இடையிலான பாலமாகச் செயல்பட்டு, மக்களின் குறைகளை வெளிச்சத்திற்குக் கொண்டு வருவதோடு, ஆரோக்கியமான விவாதங்களுக்கும் களமமைக்கிறது தொலைக்காட்சி.

நவீன சவால்களும் ஊடக அறமும்: கருப்பு-வெள்ளை திரையில் தொடங்கிய தொலைக்காட்சியின் பயணம், இன்று எல்.இ.டி (LED), 4K திரை மற்றும் இணையத்துடன் இணைந்த ஸ்மார்ட் டிவி (Smart TV) எனத் தொழில்நுட்ப ரீதியாக மாபெரும் வளர்ச்சி அடைந்துள்ளது.

இருப்பினும், ஸ்மார்ட்போன்கள், சமூக வலைதளங்கள் மற்றும் ஓடிடி (OTT) தளங்களின் அசுர வளர்ச்சியால் பாரம்பரியத் தொலைக்காட்சித் துறை இன்று கடும் சவால்களை சந்தித்து வருகிறது.

இத்தகைய சூழலில், டி.ஆர்.பி (TRP) ரேட்டிங் மற்றும் பரபரப்புச் செய்திகளுக்கு (Sensationalism) அப்பால், உண்மைத் தன்மை, நடுநிலைமை மற்றும் சமூகப் பொறுப்புணர்வுடன் செயல்படுவதே தொலைக்காட்சி ஊடகங்களின் நம்பகத் தன்மையைத் தக்கவைக்கும் என்பதே உண்மை.

1926-ல் ஒரு சின்னஞ்சிறு திரையில் தொடங்கிய இந்தத் தொலைக்காட்சிப் பயணம், இன்று நம் வாழ்க்கையின் பிரிக்க முடியாத அங்கமாக மாறி நூறு ஆண்டுகளை நிறைவு செய்துள்ளது.

ஒவ்வொரு வீட்டின் வரவேற்பறையிலும் ஒலிக்கும் அந்தக் குரல், வெறும் சத்தமாக மட்டுமல்லாமல், சமூக மாற்றத்திற்கான விதையாகவும் இருக்க வேண்டும்.

இந்த உலகத் தொலைக்காட்சி தினத்தில், ஆக்கப்பூர்வமான ஊடகப் பயன்பாட்டையும், நேர்மையான இதழியலையும் போற்றுவோம்.

– யாழினி

You might also like