அறிவியலின் வளர்ச்சி என்பது ஒரு உயிரின் அழிவில் இருக்கக்கூடாது!

ஆண்டுதோறும் ஏப்ரல் 24-ம் தேதி, ஆய்வகங்களின் நான்கு சுவர்களுக்குள் வெளிச்சம் தெரியாமல் அடைபட்டுக் கிடக்கும் கோடிக்கணக்கான வாயில்லா உயிரினங்களுக்காக ‘உலக ஆய்வக விலங்குகள் நாள்’ கடைப்பிடிக்கப்படுகிறது.

1962-ம் ஆண்டு முதல் அனுசரிக்கப்படும் இந்த நாள், அறிவியல் முன்னேற்றம் என்ற பெயரில் விலங்குகள் அனுபவிக்கும் சொல்லொணாத் துயரங்களை உலகுக்கு உரக்கச் சொல்லும் ஒரு தளமாக இருக்கிறது.

2026-ம் ஆண்டிற்கான உலக ஆய்வக விலங்குகள் நாளின் மையக்கருத்து, “மாற்று வழிமுறைகளை நோக்கிய நவீன அறிவியல்: விலங்கற்ற ஆராய்ச்சியே எதிர்காலம்” என்பதாகும்.

மனித குலத்தின் மருத்துவ மற்றும் அறிவியல் வளர்ச்சிக்கு விலங்குகளின் பங்களிப்பு அளப்பரியது என்பதை மறுக்க முடியாது.

அம்மை நோய் தடுப்பூசி முதல் இன்றைய நவீன புற்றுநோய் சிகிச்சைகள் வரை அனைத்திலும் எலிகள், முயல்கள், கினியா பன்றிகள் மற்றும் குரங்குகள் எனப் பல உயிரினங்கள் தியாகம் செய்யப்பட்டுள்ளன.

ஆனால், ஒரு மருந்தின் பாதுகாப்பை உறுதி செய்ய முயல்களின் கண்களில் ரசாயனங்களை ஊற்றுவதும், எலிகளின் உடலில் கட்டிகளை உருவாக்கி வேடிக்கை பார்ப்பதும் எந்த விதத்தில் அறமாகும் என்ற கேள்வி நீண்ட காலமாகவே எழுப்பப்பட்டு வருகிறது.

ஆண்டுதோறும் உலகளவில் சுமார் 115 மில்லியனுக்கும் அதிகமான விலங்குகள் இத்தகைய சோதனைகளில் ஈடுபடுத்தப்படுவதாகப் புள்ளிவிவரங்கள் தெரிவிக்கின்றன. இது எந்த விதத்தில் அறமாகும் என்ற கேள்வி நீண்ட காலமாகவே எழுப்பப்பட்டு வருகிறது. 

இந்தச் சூழலில் தான், விலங்குகளுக்கு எதிரான வன்முறையைக் குறைக்க ‘3R’ கொள்கை உலகளவில் முன்னெடுக்கப்படுகிறது.

அதாவது, விலங்குகளுக்குப் பதிலாக (Replacement) கணினி மாதிரிகள் அல்லது செயற்கை திசுக்களைப் பயன்படுத்துதல், சோதனையில் பயன்படுத்தப்படும் விலங்குகளின் எண்ணிக்கையைக் குறைத்தல் (Reduction) மற்றும் சோதனையின் போது அவை அனுபவிக்கும் வலியை மிகக் குறைந்த அளவில் வைத்திருத்தல் (Refinement) ஆகியவையே இந்தக் கொள்கையின் சாராம்சம், இன்றைய நவீனத் தொழில்நுட்ப வளர்ச்சியில், ஆரகன்-ஆன்-ஏ-சிப்’ (Organ-on-a-chip) போன்ற நுட்பங்கள் மனித உறுப்புகளின் செயல்பாட்டைச் செயற்கையாகச் செய்து காட்டுவதால், விலங்கு சோதனைகளின் தேவை படிப்படியாகக் குறைந்து வருகிறது.

ஆய்வுக விலங்குகளின் உரிமைகளுக்காகக் குரல் கொடுப்பது என்பது அறிவியலுக்கு எதிரானது அல்ல, அது அறம் சார்ந்த அறிவியலை நோக்கிச் செல்வதற்கான முயற்சி.

2026-ம் ஆண்டின் இந்த நாளில், ‘ஆரோக்கியத்திறகாக ஒன்றுப்படுங்கள், அறிவியலுடன் நில்லுங்கள் என்ற தாரக மந்திரத்தோடு விலங்குகள் இல்லாத ஒரு ஆராய்ச்சி உலகைப்படைக்க உறுதி ஏற்போம்.

அறிவியலின் வளர்ச்சி என்பது மற்றொரு உயிரின் அழிவில் இருக்கக்கூடாது என்பதே இந்தநாளின் உண்மையான செய்தி.

– வாத்தீ அகஸ்தீஸ்வரன்

நன்றி : ஆந்தை ரிப்போர்ட்டர்