கொடைக்கானல் ஏரியில் 5 டன் மதுபாட்டில்கள் அகற்றம்!

திண்டுக்கல் மாவட்டம், கொடைக்கானலில் நகரின் மையப்பகுதியில் நட்சத்திர ஏரி அமைந்துள்ளது. இங்கு வரும் சுற்றுலாப் பயணிகளை அதிகம் கவருவதில் ஒன்றாக நட்சத்திர ஏரி உள்ளது. ஆங்கிலேயர் காலத்தில் அமைக்கப்பட்ட இந்த ஏரி கொடைக்கானல் நகராட்சியின் கட்டுப்பாட்டில் உள்ளது.

கடந்த 3 மாதங்களாக ஏரியைத் தூய்மைப்படுத்தும் பணி நடைபெற்று வருகிறது. இதையொட்டி ஏரியில் படகுகள் மூலம் குப்பைகளைத் தூர்வாரி வருகின்றனர். மேலும், கரையில் வளர்ந்திருந்த புதர்ச்செடிகள், களைச்செடிகள் அகற்றப்பட்டு வருகின்றன.

இந்நிலையில், இந்தப் பணியின்போது 25 டன் குப்பைகள் மற்றும் 5 டன் மதுபாட்டில்கள் ஏரியில் இருந்து அகற்றப்பட்டுள்ளதாக தெரியவந்துள்ளது.

கொடைக்கானல் நகருக்கு அழகு சேர்க்கும் நட்சத்திர ஏரியில் டன் கணக்கில் குப்பைகளும், மதுபாட்டில்களும் அகற்றியிருப்பது சுற்றுச்சூழல் ஆர்வலர்கள் மத்தியில் பெரும் அதிர்ச்சியை ஏற்படுத்தியுள்ளது.