ராஜா வருகையால் நிறைவேறிய கனவு!

தெலுங்கில் முன்னணி இசை அமைப்பாளராக விளங்கும் தேவிஸ்ரீ பிரசாத், ஏராளமான தமிழ் படங்களுக்கும் இசை அமைத்துள்ளார். செல்லமாக இவரை டிஎஸ்பி என்று அழைக்கிறார்கள். (எம்.எஸ்.வி. மாதிரி)

இவர் இளையராஜாவின் தீவிர ரசிகர். பக்தர் என்றும் சொல்லலாம். அண்மையில் தேவிஸ்ரீ பிரசாத்தின் ‘புஷ்பா’ ஸ்டூடியோவுக்கு இளையராஜா சென்றுள்ளார்.

இன்ப அதிர்ச்சி அடைந்த டிஎஸ்பி, ராஜாவை வரவேற்று மகிழ்ந்தார். அவருடன் நிறைய புகைப்படங்களும் எடுத்துக் கொண்டார்.

அந்த போட்டோக்களை தனது ‘இன்ஸ்டாகிராம்’ பக்கத்தில் வெளியிட்டுள்ள தேவி  ஸ்ரீ பிரசாத், இளையராஜா குறித்து நெகிழ்ச்சியுடன், சில செய்திகளை  எழுதியுள்ளார்.

‘என் வாழ்நாள் கனவு பலித்தது’ என தலைப்பிட்டு டிஎஸ்பி, தனது உணர்வுகளை கொட்டியுள்ளார்.

“இசை என்றால் என்ன என்பதை அறியும் முன்பாகவே, சிறு குழந்தையாக இருந்த போதே, ‘மேஸ்ட்ரோ-இசைஞானி’ இளையராஜாவின் இசையைக் கேட்டு வளர்ந்திருக்கிறேன்.

நான் தேர்வுகளுக்கு படிக்கும்போது கூட அவரது இசையுடன் தான் இருப்பேன். என்னையும், அவரது இசையையும் பிரிக்க முடியாது. இசையமைப்பாளராக வர வேண்டும் என்கிற ஆவலை என் மனதுக்குள் விதைத்தது அவரது இசைதான்.

நான் இசையமைப்பாளரானதும் என்னுடைய ஸ்டுடியோவைக் கட்டினேன். இளையராஜாவின் முழு உருவப் புகைப்படத்தையும் இங்கு வைத்துள்ளேன்.

என்றாவது ஒரு நாள் ‘புஷ்பா’ ஸ்டுடியோவுக்கு அவர்  வர வேண்டும். அப்போது, என் ஸ்டுயோவில் உள்ள அவருடைய புகைப்படத்துக்கு பக்கத்தில் நின்று அவருடன் புகைப்படம் எடுக்க வேண்டும் என்பது எனது கனவாக இருந்தது.

அண்மையில் என் ஸ்டூடியோவுக்கு ராஜாசார் வந்தார். என் வாழ்நாள் கனவு நிறைவேறியிருக்கிறது.

என் ஆருயிர் இசைக் கடவுளே.. உங்களுக்கு  நன்றி.

என்னையும், எனது குழுவையும் ஆசீர்வாதம் செய்யுங்கள்” என தேவிஸ்ரீ பிரசாத் உணர்ச்சிகரமாக  குறிப்பிட்டுள்ளார்.

அவரது இந்த பதிவை ஏராளமானோர், சக நண்பர்களுக்கு அனுப்பி கொண்டாடி வருகிறார்கள்.

– பாப்பாங்குளம் பாரதி