முதல்வர்களின் முதல்வர் ஓமந்தூரார்!

நூல் அறிமுகம்:

2013- ஆம் ஆண்டு விகடன் பிரசுரம் வெளியீடாக வந்த என் ஓமந்தூரார் – முதல்வர்களின் முதல்வர் நூல் 2021- ஆம் ஆண்டு மேம்படுத்தப்பட்ட மூன்றாம் பதிப்பாக வெளிவந்து சிறப்பாக விற்பனையாகிக் கொண்டிருக்கிறது.

பெயர் சொல்ல விரும்பாத என் தொழிலதிபர் நண்பர் ஒருவர் இதன் ஆயிரம் பிரதிகளை வாங்கி பல்துறை சார்ந்த தன் நண்பர்களுக்கு வழங்கி வருகிறார்!

இடைப்பட்ட காலங்களில் ஓமந்தூரார் குறித்த கட்டுரைகள், ஒரு ஆவணப்படம், நான் நடித்து இயக்கிய The PREMIER என்ற குறும்படம் எல்லாம் நீங்கள் ரசித்து பாராட்டி விமர்சித்தவை!

அந்தக் குறும்படத்தை ஆங்கிலம் மற்றும் இந்திய மொழிகளில் திரைப்படமாக இயக்கும் பணிகள் 2024-ல் செயல் வடிவம் பெறும் நிலையில் உள்ளது! அவர் குறித்த என் மற்றுமொரு கனவு இந்த ஆண்டின் இறுதியில் கனிந்துள்ளது.

தமிழின் குறிப்பிடத்தக்க மூத்த மொழிபெயர்ப்பாளரும் இவ்வாண்டின் நல்லி – திசை எட்டும் சிறந்த மொழிபெயர்ப்பாளர் விருது பெற்றவருமான அய்யா எஸ்.வின்சென்ட் அவர்கள் என் ஓமந்தூரார் – முதல்வர்களின் முதல்வர் நூலை ஆங்கிலத்தில் மொழிபெயர்க்க உள்ளார்கள்!

அண்மையில் மதுரையில் அவர் இல்லத்தில் நூல் வழங்கி கலந்துரையாடியது மகிழ்வான தருணம்!

85 – ஆம் அகவையில் சுறுசுறுப்பாக எழுத்துப் பயணம் தொடரும் அவரை வியந்து ரசித்தேன்!

ஓமந்தூரார் – முதல்வர்களின் முதல்வர் ஆங்கில மொழி நூல் ஒரு புகழ்பெற்ற ஆங்கிலப் பதிப்பக வெளியீடாக வருகிறது உங்களின் தோழமை வாழ்த்துகளுடன்! அய்யாவை வாழ்த்துங்களேன் தோழமைகளே.

கலை இனிது. இலக்கியம் இனிது. வாழ்வினிது.