பெண்களின் நிஜமான வலி…!

நடிகை ஜோதிகாவின் 50-வது படமான ‘உடன்பிறப்பே’ திரைப்படம் தற்போது தயாராகி உள்ளது.

இந்நிலையில் இணையதளத்தில் நடந்த கலந்துரையாடல் நிகழ்ச்சி ஒன்றில் கலந்து கொண்டு தனது சினிமா வாழ்க்கை அனுபவங்கள் குறித்து பேசிய ஜோதிகா, “எனது கணவர் சூர்யா இல்லையென்றால் நான் ஒன்றுமே இல்லை. அவருக்கு நன்றி.

எனது சினிமா பயணம் எளிமையானது. பெரிய நடிகர்கள் படங்களில் நடிக்க வேண்டும் என்ற ஆர்வம் இருந்தது.

எனது திரைப்பயணத்தில் இரண்டாவது இன்னிங்ஸ் முக்கியமானது. இதில் நிறையக் கற்றுக் கொண்டேன். கடந்த 8 வருடங்களாக  சமூகக் கருத்துள்ள படங்களில் நடித்திருக்கிறேன் என்ற திருப்தி எனக்கிருக்கிறது.

பெண்களும், குடும்பத்தினரும் பெருமைப்படும்படியான படங்களில் நடிக்க விரும்புகிறேன். அதுமாதிரி படங்களைத்தான் ஒப்புக்கொள்கிறேன். கடந்த 8 வருடங்களில் இதைத்தான் கற்றுக் கொண்டேன்.

எனது 50-வது படமான ‘உடன்பிறப்பே’ மிகவும் முக்கியமானது. இதுவரை நடித்த படங்களில் நிறைய பேசி இருக்கிறேன். ஆனால் பெண்களுடைய நிஜமான வலியை இந்தப் படத்தில்தான் பிரதிபலித்து இருக்கிறேன்.

அதுதான் அமைதி. 90 சதவீதம் பெண்கள் அதுமாதிரிதான் வாழ்ந்து கொண்டிருக்கிறார்கள். அமைதியாகவும், வலிமையுடனும் இருக்கிறார்கள். இதுவரை நடித்த படங்களில் இது வலிமையான கதாபாத்திரம்” என்றார்.