தமிழ் சினிமாவின் நம்பகமான வில்லன் எம்.என்.நம்பியார்!

தமிழ் சினிமாவில் வில்லத்தனம் என்றாலே எல்லோர் மனதிலும் முதலில் நினைவுக்கு வருவது நம்பியராக தான் இருக்கும்.  “சரியான நம்பியார் நீ” என தான் நெகடிவ் ரோல்களில் நடிப்பவர்களை விமர்சிக்கிறார்கள். அந்த அளவுக்கு வில்லன் ரோல்களின் ரோல் மாடல் எம்.என்.நம்பியார்.

மஞ்சேரி நாராயணன் நம்பியார் என்ற அவரது நிஜ பெயர் சுருங்கி தான் எம்.என்.நம்பியார் என்றாகியது. தமிழ் சினிமா ரசிகர்கள் அதிகம் வெறுத்த பல வில்லன் கதாபாத்திரங்களில் மிரட்டியவர் தான் இவர்.

கதாநாயகன், குணச்சித்திர நடிகர், வில்லன் என பல பரிமாணங்களில் முத்திரை பதித்த இவர், எம்ஜிஆர், சிவாஜி ஆகியோரின் பெரும்பாலான படங்களில் வில்லன் கதாபாத்திரத்தை நடித்து மிரட்டி இருந்தார். அவரது நடிப்பில் மறக்கமுடியாத 5 படங்களின் தொகுப்பு இது.

மந்திரகுமாரி :

எம்ஜிஆர், மாதுரி தேவி, எம்.என்.நம்பியார் ஆகியோர் நடிப்பில் வெளியான திரைப்படம் மந்திரகுமாரி. இப்படத்தின் வசனம், திரைக்கதை மு.கருணாநிதி எழுதியிருந்தார். இப்படத்தில் மன்னரை ஆட்டிப்படைக்கும் ராஜகுருவாக நம்பியார் நடித்திருந்தார். இப்படத்தில் நம்பியாரின் நடிப்பு மக்கள் மத்தியில் நல்ல வரவேற்பு பெற்றிருந்தது.

வேலைக்காரி :

கே.ஆர்.ராமசாமி, வி.என்.ஜானகி , எம்.வி.ராஜம்மா, எம்.என்.நம்பியார் ஆகியோர் நடிப்பில் 1949 ஆம் ஆண்டு வெளியான திரைப்படம் வேலைக்காரி. இப்படத்திற்கு அண்ணா எழுதிய வசனங்கள் மிகவும் பாராட்டப்பட்டது. இப்படத்தில் ஒரு பணக்காரரின் மகன் மூர்த்தியாக நம்பியார் நடித்திருந்தார்.

ஆயிரத்தில் ஒருவன் :

எம்ஜிஆர், ஜெயலலிதா, எம்.என்.நம்பியார் ஆகியோர் நடிப்பில் 1965-ல் வெளியான திரைப்படம் ஆயிரத்தில் ஒருவன். இப்படத்தில் கடற்கொள்ளையர்களின் தலைவனாக நம்பியார் நடித்திருந்தார். இப்படத்தில் தன்னுடைய சிறப்பான நடிப்பை வெளிப்படுத்தியிருந்தார் நம்பியார். அதன் பிறகு எம்ஜிஆர் படம் என்றாலே அதில் நம்பியார் தான் வில்லன் கதாபாத்திரம் என தேர்வு செய்யப்பட்டார்.

தில்லானா மோகனாம்பாள் :

ஏ.பி.நாகராஜன் இயக்கத்தில் சிவாஜி கணேசன், பத்மினி ஆகியோர் நடிப்பில் மிகப்பெரிய வெற்றி பெற்ற திரைப்படம் தில்லானா மோகனாம்பாள். இப்படத்தில் எம்.என்.நம்பியார் மதன்பூரின் மகாராஜாவாக வில்லன் கதாபாத்திரத்தில் நடித்திருந்தார்.

தூறல் நின்னு போச்சு :

கே பாக்யராஜ் இயக்கத்தில் பாக்யராஜ், சுலோச்சனா, எம்.என்.நம்பியார் ஆகியோர் நடிப்பில் வெளியான திரைப்படம் தூறல் நின்னு போச்சு. இப்படத்தில் குஸ்தி வாத்தியாராக நம்பியார் நடித்திருந்தார். இப்படத்தில் தன்னுடைய எதார்த்தமான நடிப்பால் ரசிகர்கள் மனதை கவர்ந்தார் நம்பியார்.

– நன்றி சினிமா பட்டி இதழ்