டெல்லி இளைஞர்களின் எழுச்சியை எப்படிப் பார்ப்பது?

கரப்பான் பூச்சி ஜனதா கட்சி என்பது நாட்டின் இளைஞர்களின் உரிமைகளுக்காகவும், அதிகார வர்க்கத்தின் அலட்சியப் போக்கிற்கு எதிராகவும் உருவான ஒரு விசித்திரமான, அதே வேளையில் வலுவான நையாண்டி இயக்கமாகும்.

சமூக வலைதளங்களில் சிறு பொறியாகத் தொடங்கிய இந்த இயக்கம் தற்போது வீதிப் போராட்டமாக உருவெடுத்து மக்கள் மத்தியில் பெருமளவில் கவனத்தைப் பெற்று வருகிறது.

உருவாக்கமும் பின்னணியும் :

உச்சநீதிமன்ற நீதிபதி சூர்யகாந்த் அவர்கள் வழக்கு விசாரணையின் போது வேலைவாய்ப்பற்ற இளைஞர்களைக் குறித்துக் கூறிய சர்ச்சைக்குரிய கருத்தே இந்த இயக்கம் உருவாக முக்கியப் புள்ளியாக அமைந்தது.

அந்த கருத்திற்குத் தனது எதிர்ப்பைப் பதிவுசெய்யும் வகையில், அதிகார அமைப்புகளால் புறக்கணிக்கப்பட்டு மிதிக்கப்படும் இளைஞர்களின் அடையாளமாகக் கரப்பான் பூச்சியை முன்னிறுத்தி இணைய வழியில் இந்த இயக்கம் முதலில் தொடங்கப்பட்டது.

கரப்பான் பூச்சி ஜனதா கட்சி ஆரம்பத்தில் ஒரு அரசியல் நையாண்டி மற்றும் இணையக் கேலியாக (Satirical / Internet Meme Movement) மட்டுமே பார்க்கப்பட்டது.

இணையப் பிரச்சாரத்தின் தொடக்கம் :

“வேலைவாய்ப்பற்ற இளைஞர்கள் கரப்பான் பூச்சிகள் போல இடத்திற்குப் போராடுகிறார்கள்” என்ற தொனியில் வந்த கருத்துக்கு எதிர்ப்பாக,

“அனைத்து கரப்பான் பூச்சிகளும் ஒன்று திரண்டால் என்னவாகும்?” என்ற எளிய கேள்வியோடு இது இணையத்தில் வைரலானது.

செயற்கை நுண்ணறிவு, மீம்ஸ் வடிவமைப்பு :

தொடக்கத்தில் இந்த அமைப்பிற்கான கொள்கை அறிக்கைகள், இணையதளம் மற்றும் விளம்பரப் படங்கள் அனைத்தும் செயற்கை நுண்ணறிவு (AI) கருவிகளைக் கொண்டு உருவாக்கப்பட்டன.

தேர்தல் ஆணையத்தில் பதிவுசெய்யப்பட்ட வழக்கமான அரசியல் கட்சியாக இல்லாமல், அதிகார வர்க்கத்தைக் கேள்வி கேட்கும் கேலிச்சித்திர இயக்கமாகவே இது கட்டமைக்கப்பட்டது.

ஜென்சி (Gen Z) இளைஞர்களின் ஆதரவு :

அமைப்பில் உள்ள குறைகளை நகைச்சுவையோடு சாடும் இவர்களின் பாணி இளைஞர்களைப் பெரிதும் ஈர்த்தது.

அதிகார அமைப்பால் கணக்கில் எடுத்துக்கொள்ளப்படாத மக்களுக்கான இயக்கம் என்ற அடையாளத்தோடு தொடங்கப்பட்டதால், சமூக வலைதளங்களில் மிகச் குறுகிய காலத்தில் லட்சக்கணக்கான ஆதரவாளர்களைப் பெற்றது.

ஆரம்பத்தில் வெறும் இணையக் கேலியாக மட்டுமே பார்க்கப்பட்ட இந்த இயக்கம், பிற்பாடு தேர்வுத்தாள் கசிவு மற்றும் வேலையில்லாத் திண்டாட்டம் போன்ற சாமானிய இளைஞர்களின் நிஜப் பிரச்சினைகளை முன்வைத்து வீதிப் போராட்டமாக உருவெடுத்தது.

இதற்கு யார் தலைமை :

அமெரிக்காவில் உள்ள பாஸ்டன் பல்கலைக் கழகத்தில் பயிலும் அபிஜித் தீப்கே என்ற இந்திய மாணவர் இந்த இயக்கத்தைத் தொடங்கினார்.

அவரே இந்த அமைப்பின் முதன்மைத் தலைவராகவும் முக்கிய ஒருங்கிணைப்பாளராகவும் செயல்பட்டு வருகிறார்.

நோக்கம், செயல்பாடுகள் :

இதன் நோக்கம் என்ன? அதிகார அமைப்புகளால் புறக்கணிக்கப்படும் சாமானிய இளைஞர்களின் குரலை உரக்கச் சொல்வது இந்த இயக்கத்தின் முக்கியப் பொறுப்பாகும்.

கல்வி மற்றும் வேலைவாய்ப்பு தொடர்பான முறைகேடுகளுக்கு எதிராகக் குரல்கொடுப்பதும், இளைஞர்களின் நியாயமான கோரிக்கைகளுக்காக அமைதி வழியில் போராட்டங்களை முன்னெடுப்பது போன்றவை இதன் முதன்மை நோக்கங்களாக இருந்து வருகிறது.

போராட்டமும் தற்போதைய நிலையும் : 

இணைய வழியில் தொடங்கப்பட்ட இந்த இயக்கம் குறுகிய காலத்தில் பெரும் வரவேற்பைப் பெற்றது.

இளைஞர்கள் திரளாக இதில் இணைந்ததைத் தொடர்ந்து, அமைப்பின் அதிகாரப்பூர்வ சமூக வலைதளப் பக்கங்கள் முடக்கப்பட்டன.

சமூக வலைதளப் பக்கங்கள் முடக்கப்பட்டதற்கான பின்னணி

செயற்கை நுண்ணறிவு (AI) மற்றும் போலி கணக்குகள்:

ஏஐ மூலம் உருவாக்கப்பட்ட தொடர் உள்ளடக்கங்கள் மற்றும் தானியங்கி கணக்குகள் (Bots) மூலம் கருத்துகள் பரப்பப்பட்டதால், ‘ஸ்பேம்’ தடுப்பு விதிகளின் கீழ் பக்கங்கள் முடக்கப்பட்டன.

ஜென் ஸி இளைஞர்களின் திடீர் ஆதரவால் ஒரே நேரத்தில் பெருமளவிலான கணக்குகள் இணைந்து ஒரே வகையான கருத்துகளைப் பகிர்ந்ததால், தளங்களின் நெறிமுறைப்படி தானியங்கி கண்காணிப்பில் பக்கங்கள் முடங்கின.

அதிகார வர்க்கத்தின் புகார்கள் :

நீதிமன்றம், நீதிபதி மற்றும் அரசு அதிகாரிகளை விமர்சித்து வெளியிடப்பட்ட மீம்ஸ்கள் ‘இழிவுபடுத்தும் உள்ளடக்கம்’ எனக் கருதப்பட்டு, அரசு தரப்பில் அளிக்கப்பட்ட புகார்களின் பேரில் நடவடிக்கைகள் எடுக்கப்பட்டன.

களப் போராட்டத்தின் தாக்கம் :

இணையப் பிரச்சாரம் ஜந்தர் மந்தரில் வீதிப் போராட்டமாக மாறியதால், சட்டம்-ஒழுங்கு காரணங்களுக்காக இக்கட்டுப்பாடுகள் தீவிரப்படுத்தப்பட்டன.

இந்த முடக்கமே ஒருங்கிணைப்பாளர் அபிஜித் தீப்கே இந்தியா திரும்பி புதுடெல்லியில் உள்ள ஜந்தர் மந்தர் பகுதியில் கல்வித்துறை சீர்திருத்தங்களை வலியுறுத்தியும் வேலையில்லாத் திண்டாட்டத்திற்கு எதிராகவும் அமைதிப் போராட்டத்தைத் தொடங்கினார்.

சமீபத்தில் இந்தப் போராட்டம் தீவிரமடைந்து, நாடாளுமன்றத்தை நோக்கி பேரணியாகச் செல்ல முயன்றபோது காவல்துறையினருடன் தள்ளுமுள்ளு ஏற்பட்டது. கூட்டத்தைக் கலைக்கக் கண்ணீர்புகைக்குண்டுகள் வீசப்பட்டன.

போராட்டக்காரர்களைக் கலைக்கக் காவல்துறையினர் நடவடிக்கை எடுத்தபோது சிலருக்குக் காயங்கள் ஏற்பட்டன, மேலும் சிலர் தடுத்து வைக்கப்பட்டனர்.

காயமடைந்தவர்களுக்கு உரிய மருத்துவ சிகிச்சைகள் அளிக்கப்பட்டு வருகிறது.

கரப்பான் பூச்சி ஜனதா கட்சி என்பது வெறும் இணைய மீம்ஸாகவும், நையாண்டிப் பிரச்சாரமாகவும் தொடங்கப்பட்டாலும், அது சாமானிய இளைஞர்களின் வேலையில்லாத் திண்டாட்டம் மற்றும் கல்வித்துறை அமைப்பில் உள்ள குறைபாடுகளைப் பிரதிபலிக்கும் ஒரு வலுவான குறியீடாக மாறிவருகிறது.

அமைதி வழியில் போராடிய மாணவர்கள் மீதான அடக்குமுறைகளும், சமூக வலைதளப் பக்கங்களின் முடக்கங்களும் அவர்களின் குரலை நசுக்கவில்லை; மாறாக, டெல்லியிலிருந்து சென்னை வரை இப்போராட்டம் பரவுவதற்கே வழிவகுத்துள்ளன.

கேலிச்சித்திர இயக்கமாகத் தொடங்கப்பட்ட ஒரு முயற்சி, இன்று அதிகார அமைப்புகளின் அலட்சியப் போக்கைக் கேள்வி கேட்கும் உண்மையான இளைஞர் எழுச்சியாக உருவெடுத்துள்ளது.

இளைஞர்களின் நியாயமான கோரிக்கைகளை அடக்குமுறையால் எதிர்கொள்வதற்குப் பதிலாக, அரசு அவர்களுடன் பேச்சுவார்த்தை நடத்தி முறையான தீர்வுகளை வழங்குவதே இதற்கான சரியான தீர்வாக அமையும்.

– யாழினி