இலக்கியம் சுவைக்கும் இளம் தலைமுறை!

காஞ்சியில் நடைபெற்ற இளையோர் இலக்கியப் பயிற்சிப் பாசறை: ஒரு பார்வை!

தமிழ் வெறும் மொழியல்ல; நம் வாழ்வின் வேர்களையும், சிந்தனையின் கிளைகளையும், பண்பாட்டின் ஆழங்களையும் தன்னுள் பொதிந்திருக்கும் பேரியக்கம்.

அந்த மொழியின் இலக்கியச் செல்வங்களை இளைய தலைமுறையிடம் கொண்டு சேர்ப்பதும், அவர்களுக்குள் படைப்பாற்றலையும் மொழியுணர்வையும் விதைப்பதும் காலத்தின் இன்றியமையாத தேவையாகிறது.

அத்தகைய நோக்கத்துடன் காஞ்சிபுரத்தில் நடைபெற்ற ‘இளையோர் இலக்கியப் பயிற்சிப் பாசறை’ நிகழ்வு, தமிழ் இலக்கியத்தின் பல்வேறு பரிமாணங்களை இளையோரிடம் திறந்துவைத்த ஓர் அரிய வாய்ப்பாக அமைந்தது.

தமிழ் வளர்ச்சித் துறையின் சார்பில், 28.10.2026 அன்று காஞ்சிபுரம் எஸ்.எஸ்.கே.வி. மகளிர் கலை அறிவியல் கல்லூரியில் நடைபெற்ற இந்நிகழ்வு, தமிழின் மீதான பற்றையும் இலக்கியத்தின் மீதான ஈடுபாட்டையும் இளைய தலைமுறையினரிடையே வளர்க்கும் நோக்கில் ஒருங்கிணைக்கப்பட்டது.

தமிழால் உயர்வோம்!

நிகழ்ச்சியின் தொடக்க விழாவைக் காஞ்சிபுரத்தின் துணை ஆட்சியர் தொடங்கி வைத்தார்.

தமது உரையில், “நான் திருவள்ளூர் மாவட்டத்தைச் சேர்ந்த தமிழன். என் தோற்றத்தைப் பார்த்துப் பலரும் என்னை இந்திக்காரர் என்று நினைக்கலாம். ஆனால் அது உண்மையல்ல” என்று குறிப்பிட்ட அவர், தாம் தமிழால் பெரிதும் ஈர்க்கப்பட்டவர் என்பதை உணர்ச்சியோடு வெளிப்படுத்தினார்.

தமது ஆட்சிப் பணிக்கான நேர்முகத் தேர்வில், “தெய்வத்தால் ஆகாது எனினும் முயற்சிதன் மெய்வருத்தக் கூலி தரும்” என்னும் திருக்குறளைச் சொல்லியே உரையாடிய அனுபவத்தைப் பகிர்ந்துகொண்டார்.

பாரதியின் புதிய ஆத்திச்சூடி தமக்கு மிகவும் பிடித்தமானது என்றும், தமது இணையப் பக்கங்களை “வையத் தலைமை கொள்”, “பெரிதினும் பெரிது கேள்” என்னும் பாரதியின் வரிகளைக் கொண்டு அமைத்துள்ளதாகவும் குறிப்பிட்டார்.

தமிழ் என்பது நம்மை உயர்த்தும் ஆற்றல் கொண்டது; நம்மை முன்னோக்கி உந்தித் தள்ளும் உயிராற்றல் கொண்டது என்பதை மாணவிகளுக்கும் பார்வையாளர்களுக்கும் புத்துணர்ச்சியூட்டும் வகையில் எடுத்துரைத்தார்.

மொழி என்பது அடையாளம் மட்டுமல்ல, உயர்வுக்கான வழியும் என்பதை அவரது உரை உணர்த்தியது.

அவரைத் தொடர்ந்து கல்லூரி முதல்வர் முனைவர் திருமாமகள் உரையாற்றினார்.

மகளிர் கல்லூரியில் பயிலும் மாணவிகள் கல்வியில் தேர்ச்சி பெறுவதோடு மட்டும் நின்றுவிடாமல், இலக்கியங்களை உள்வாங்கி, அவற்றின் வழியாகச் சிந்தித்து, படைக்கும் ஆற்றலை வளர்த்துக்கொண்டு படைப்பாளுமைகளாக வெளிப்பட வேண்டும் என்று வலியுறுத்தினார்.

மாணவிகளின் அறிவையும் ஆற்றலையும் விரிவுபடுத்துவதில் தமிழ் வளர்ச்சித் துறையின் இத்தகைய நிகழ்வுகள் முக்கியப் பங்காற்றுகின்றன என்பதையும் சுட்டிக்காட்டினார்.

காலந்தோறும் ஏற்றம் விளைவிக்கும் இலக்கியம்

தொடர்ந்து இரண்டு அமர்வுகளாகத் தமிழார்வலர்களின் உரை நிகழ்வுகள் நடைபெற்றன.

முதலாவதாக, ஓய்வுபெற்ற தமிழாசிரியரும் கவிஞருமான சுகுமாரன், ‘எல்லாக் காலத்திலும் ஏற்றம் விளைவிக்கும் ஆற்றல்மிகு இலக்கியம்’ என்னும் தலைப்பில் உரையாற்றினார்.

தமிழ் இலக்கியம் அழகியல் ஆவணமாகவும், அறிவின் வெளிப்பாடாகவும், கல்வெட்டாகவும், அகழாய்வின் சான்றாகவும் காலந்தோறும் தன்னைப் புதுப்பித்துக்கொண்டே வந்திருப்பதை எடுத்துரைத்தார்.

தமிழின் பிறப்பையும் அதன் வரலாற்றுப் பயணத்தையும் தொட்டுச்சென்ற அவரது உரை, இலக்கியத்தின் அழகியலைப் பல்வேறு படைப்புகளின் வழியாக நமக்கு உணர்த்தியது.

குழந்தைகள் அம்மாவைப் பிறப்பெடுக்கச் செய்கிறார்கள் என்ற கவித்துவமான பார்வையில் தொடங்கி, ‘கற்க கசடற’ என்னும் திருக்குறளின் பொருளாழத்தையும், இலக்கணத்தின் அடித்தளமாகத் திகழும் தொல்காப்பியத்தின் சிறப்பையும் எடுத்துரைத்தார்.

வணிக மொழி பேசும் கோவலனிடம் அமைதி காத்த கண்ணகி, அதிகாரத்தின் அநீதியைப் பொறுத்துக்கொள்ள இயலாமல் “தேரா மன்னா!” என்று கேள்வி எழுப்பும் சிலப்பதிகாரக் காட்சியை நினைவூட்டினார்.

பெண்ணின் நீதியுணர்வையும் உரிமைக் குரலையும் காப்பியத்தின் வழியாக வெளிப்படுத்தினார்.

பசிப்பிணியையும் பரத்தமையையும் ஒழிக்கவும், பௌத்த அறத்தை நிலைநாட்டவும் வந்த மணிமேகலையின் நோக்கத்தையும், பாரதியின் பாஞ்சாலி சபதம் வெளிப்படுத்தும் சமூகச் சாடலையும் எடுத்துரைத்தார்.

பாரதிதாசனின் தமிழியக்கம், இயற்கையின் அழகு, புலமைப்பித்தனின் பாடல்வரிகள் எனப் பல்வேறு இலக்கியச் சான்றுகளின் வழியாகத் தமிழின் அழகியலையும் வாழ்வியல் ஆற்றலையும் கவிமொழியில் வெளிப்படுத்தினார்.

இலக்கியம் என்பது காலத்தின் கண்ணாடி என்பதோடு, காலத்தைப் புரட்டிப் பார்க்கும் அறிவின் கருவியும் ஆகும் என உணர்த்தியது இவர் உரையரங்கம்.

மொழி உணர்வு – வாழ்வின் அடையாளம்

தேநீர் இடைவேளைக்குப் பிறகு, காஞ்சி தமிழ் மன்றத் தலைவர் முனைவர் கதிரவன் ‘மொழி உணர்ச்சி’ என்னும் தலைப்பில் உரையாற்றினார்.

சமூகத்தில் நிலவும் ஆண் – பெண் சமத்துவமின்மையையும், பணிச்சுமையிலும் கூலியிலும் பெண்கள் எதிர்கொள்ளும் ஏற்றத்தாழ்வுகளையும் சுட்டிக்காட்டிய அவர், மொழியின் வழியாக வெளிப்படும் தாய்மையின் அடையாளங்களை முன்வைத்தார்.

“தாய்மொழி”, “தாய்நாடு” என்னும் சொற்கள், தமிழர்களின் வாழ்வியல் வரலாற்றில் தாய்வழிச் சமூகத்தின் தடங்களை உணர்த்துவதாகக் குறிப்பிட்டார்.

ஐம்பதாயிரம் ஆண்டுகள் பழமையான மொழி என்று பெருமை பேசும் நாம், அதே மொழியில் எழுதவும் பேசவும் தயங்கும் முரண்பாட்டைச் சுட்டிக்காட்டினார்.

பிறக்கும் குழந்தைகளுக்கும், கதைகளுக்கும், பெயர்ப் பலகைகளுக்கும் நாம் சூட்டும் பெயர்களின் பொருளைக்கூட அறியாமல் கடந்து செல்லும் மொழி அலட்சியத்தையும் எடுத்துரைத்தார்.

சில பெயர்களின் உண்மையான பொருள்களை விளக்கி, மொழிக்கலப்பால் உருவாகும் குழப்பங்களையும் சிக்கல்களையும் மாணவிகளுக்குப் புரியும் வகையில் எடுத்துரைத்தார்.

மொழி உணர்வு என்பது வெறும் உணர்ச்சிப் பெருக்கு அல்ல; மொழியை அறிந்து, அதன் பொருளுணர்ந்து, வாழ்வில் பயன்படுத்துவதன் வழியாக வெளிப்படும் பொறுப்புணர்வு என்பதை அவரது உரை வலியுறுத்தியது.

இலக்கியத்தை நாடு; இமயத்தைத் தொடு!

கதிரவனைத் தொடர்ந்து, திரு.வி.க. பேச்சுப் பயிலரங்கப் பயிற்றுநரும் வழக்கறிஞருமான தாமோதரன் ‘இலக்கியத்தை நாடு, இமயத்தைத் தொடு’ என்னும் தலைப்பில் உரையாற்றினார்.

குறிப்பிட்ட நேரத்திற்குள் பேச்சுக்கலையின் அவசியத்தையும், பேசிப் பழக வேண்டியதன் நோக்கத்தையும் சுருக்கமாகவும் ஆழமாகவும் எடுத்துரைத்தார்.

ஆயிரம் நூல்களைப் படித்திருந்தாலும், தேர்வுகளில் வெற்றி பெற்றிருந்தாலும், நேர்முகத் தேர்வில் பேசுவதற்குத் தயங்கும் இளையோரின் மனநிலையைத் தமது அனுபவங்களின் வழியாகச் சுட்டிக்காட்டினார்.

பேசுதல் என்பது வெறும் சொற்களை உதிர்ப்பதல்ல; நம்முள் இருக்கும் உணர்வுகளையும் சிந்தனைகளையும் பிறருக்குப் புரியும்படி வெளிப்படுத்தும் அடிப்படை ஆற்றல் என்பதை வலியுறுத்தினார்.

பல்வேறு திருக்குறள்களை எடுத்துக்காட்டி, மாணவிகள் தமது கருத்துகளைத் தெளிவாகவும் துணிவாகவும் வெளிப்படுத்திப் பேசிப் பழக வேண்டும் என்று அறிவுறுத்தினார்.

அவரது உரையில் வெளிப்பட்ட இலக்கியப் பற்றும் நினைவாற்றலும் மாணவிகளுக்கு ஊக்கமளிப்பதாக அமைந்தன.

இலக்கியத்தில் அறச்சிந்தனைகளும் பெண்ணியப் பார்வையும்

பிற்பகல் அமர்வில் முதலில், சதுரை திருக்குறள் பேரவையின் நெறியாளர் ஆ.தி.பகலன், ‘தமிழ் இலக்கியத்தில் அறச்சிந்தனைகள்’ என்னும் தலைப்பில் உரையாற்றினார்.

ஐம்பெரும் காப்பியங்களின் வழியாகப் பெண்களின் அறச்செயல்களையும், பெண்ணியச் சிந்தனைகளையும் முன்வைத்தார்.

சிலப்பதிகாரத்தில் கண்ணகியின் அமைதி போற்றப்படும் இன்றைய சமூகச் சூழலையும், மணிமேகலை முன்வைத்த துறவு நிலை அதே அளவில் ஏற்றுக்கொள்ளப்பட முடியாத முரண்பாடுகளையும் சுட்டிக்காட்டினார்.

சீவக சிந்தாமணி மணநூல் என அழைக்கப்படுவதற்கான காரணங்களையும், வளையாபதி, குண்டலகேசி போன்ற காப்பியங்கள் அதிகம் பேசப்படாமல் போனதற்கான சமூகப் பின்னணிகளையும் எடுத்துரைத்தார்.

இக்காப்பியங்களில் இடம்பெறும் பெண் கதைமாந்தர்களின் புரட்சிகரமான சிந்தனைகள், ஆண் – பெண் ஏற்றத்தாழ்வு மனநிலைகளுடன் எவ்வாறு தொடர்புபடுகின்றன என்பதை எடுத்துக்காட்டுகளுடன் விளக்கினார்.

இலக்கியங்களை வாசிப்பது என்பது கதைகளை அறிந்துகொள்வது மட்டுமல்ல; அவற்றின் பின்னால் இயங்கும் சமூக மனநிலைகளையும் அதிகார உறவுகளையும் புரிந்துகொள்வதாகும் என்பதை அவரது உரை உணர்த்தியது.

தமிழின் மேன்மை — சொல்லில் அடங்காத பெருவளம்

காஞ்சிபுரம் திருக்குறள் பேரவையைச் சேர்ந்த ஜோதி ‘தமிழின் மேன்மை’ என்னும் தலைப்பில் உரையாற்றினார்.

சொல்லி முடிக்க முடியாத அளவிற்கு விரிந்திருக்கும் தமிழ் இலக்கியத்தின் செல்வாக்கையும் வளத்தையும் எடுத்துரைத்தார்.

திருக்குறள்களை மேற்கோள் காட்டி, தமிழின் மேன்மையையும் அதன் வழியாக வெளிப்படும் வாழ்வியல் சிந்தனைகளையும் முன்வைத்தார்.

தமிழ் இலக்கியம் என்பது கடந்த காலத்தின் பெருமைகளை மட்டும் பேசும் களஞ்சியமாகவும் இன்றைய வாழ்வுக்கான சிந்தனைகளையும் நாளைய தலைமுறைக்கான வழிகாட்டுதல்களையும் தன்னுள் கொண்டிருக்கும் அறிவுலகமாகவும் இருப்பதை இவர் உரை நினைவூட்டியது.

இலக்கியம் சுவைப்பதற்கே!

இறுதியாக, எஸ்.எஸ்.கே.வி. கல்லூரிப் பேராசிரியர் பிரியா, ‘இலக்கியம் சுவைப்பதற்கே’ என்னும் தலைப்பில் உரையாற்றினார்.

மாணவிகளின் ஆரவாரத்துடன் தொடங்கிய அவரது உரை, இலக்கியத்தை மகிழ்ச்சியுடன் வாசித்து, அதன் சுவையை உணர்ந்து, வாழ்வோடு இணைத்துக்கொள்ள வேண்டியதன் அவசியத்தை எடுத்துரைத்தது.

கவிதைகள், கதைகள் எனப் பல்வேறு இலக்கிய வடிவங்களைச் சுவாரசியமாக முன்வைத்து, மாணவிகள் இலக்கியத்தை ஒரு பாடமாக மட்டுமல்லாமல், ரசித்து அனுபவிக்க வேண்டிய வாழ்வியல் அனுபவமாக அணுக வேண்டும் என்பதை வலியுறுத்தினார்.

குறிப்பிட்ட நேரத்திற்குள் கருத்துகளை அழகாகவும் தெளிவாகவும் வெளிப்படுத்திய அவரது உரை, மாணவிகளிடையே இலக்கியத்தின் மீதான ஆர்வத்தை மேலும் தூண்டுவதாக அமைந்தது.

நம்பிக்கையூட்டும் எதிர்காலம்

நிகழ்ச்சியை காஞ்சிபுரம் மாவட்டத் தமிழ் வளர்ச்சித் துறையின் உதவி இயக்குநர் திருமதி ம.சாந்தி ஒருங்கிணைத்து நடத்தினார். நிகழ்வில் பங்கேற்ற பேச்சாளர்களின் கருத்துகளைச் சுட்டிக்காட்டி, கல்லூரிப் பேராசிரியர்கள் தொகுப்புரையும் நன்றியுரையும் நல்ல தமிழில் நிகழ்த்தினர்.

கல்லூரியில் பயிலும் இளங்கலை மற்றும் முதுகலைத் தமிழிலக்கிய மாணவிகள் அனைவரும் நிகழ்வில் பங்கேற்று, உரைகளைக் கவனமாகக் கேட்டுக் குறிப்புகள் எடுத்துக்கொண்டனர்.

இறுதியில் தங்களது கேள்விகளையும் ஐயங்களையும் முன்வைத்து விளக்கங்களைப் பெற்றனர். மாணவிகளின் அமைதியும் ஆர்வமும் வரவேற்கத்தக்கதாக இருந்தன.

தமிழ் வளர்ச்சித் துறை, பிற்பகல் உணவு உள்ளிட்ட ஏற்பாடுகளுடன் நிகழ்ச்சியைச் சிறப்பாக ஒருங்கிணைத்திருந்தது. காஞ்சிபுரத்தைச் சேர்ந்த தமிழார்வலர்களும் பார்வையாளர்களாகக் கலந்துகொண்டு நிகழ்வின் சிறப்பை மேலும் கூட்டினர்.

இந்நிகழ்வின் ஒவ்வொரு உரையும் வெவ்வேறு திசைகளில் பயணித்தாலும், அவை அனைத்தும் வந்து சேர்ந்த இடம் ஒன்றுதான் – தமிழ் இலக்கியம் இளைய தலைமுறையின் வாழ்வில் ஆழமாக வேரூன்ற வேண்டும் என்பதே அவை.

இலக்கியம் நம்மை அழகுணர்வோடு வாழச் செய்கிறது; அறத்தோடு சிந்திக்கச் செய்கிறது; அநீதிக்கு எதிராகக் கேள்வி எழுப்பச் செய்கிறது; நம்முள் உறங்கிக்கிடக்கும் படைப்பாற்றலைத் தட்டி எழுப்புகிறது.

மொழியின் மீதான உணர்வைச் செயலாக்கி, வாசிப்பை வாழ்வின் ஒரு பகுதியாக மாற்றும்போது மட்டுமே அதன் உண்மையான பயனை நாம் அடைய முடியும்.

மாணவிகள் குறிப்பெடுத்துக் கொண்டிருந்த காட்சியும், கேள்விகளை எழுப்பிய ஆர்வமும், இலக்கியத்தைச் சுவைக்கத் தூண்டும் உரைகளும் இந்நிகழ்வின் வெற்றியை உணர்த்தின.

இளைய தலைமுறையிடம் தமிழ் இலக்கியத்தின் ஆழத்தையும் அகலத்தையும் கொண்டு சேர்க்கும் இத்தகைய பயிற்சிப் பாசறைகள் தொடர்ந்து நடைபெற வேண்டும்.

தமிழ் வளர்ச்சித் துறையின் இம்முயற்சி, மாணவிகளுக்கான ஒரு நாள் நிகழ்வாக மட்டும் நின்றுவிடாமல், அவர்களுக்குள் புதிய வாசகர்களையும், சிந்தனையாளர்களையும், படைப்பாளிகளையும் உருவாக்கும் தொடக்கமாக அமைய வேண்டும் என்பதே என் விருப்பம்.

தமிழ் இலக்கியம் வாசிக்கப்படட்டும்; சுவைக்கப்படட்டும்; புதிய தலைமுறையின் சிந்தனைகளில் புதிதாகப் பிறக்கட்டும்!

– மைத்திரி அன்பு, காஞ்சிபுரம்.

#காஞ்சிபுரம் #Kanchipuram #இளையோர்இலக்கியப்பயிற்சிப்பாசறை #YouthLiteraryWorkshop #தமிழ்வளர்ச்சித்துறை #TamilDevelopmentDepartment #தமிழ்இலக்கியம் #TamilLiterature #தமிழ்மொழி #TamilLanguage #தமிழ்ப்பற்று #LoveForTamil #இளையோர்கல்வி #YouthEducation #இலக்கியவாசிப்பு #LiteratureReading #திருக்குறள் #Thirukkural #திருவள்ளுவர் #Thiruvalluvar #பாரதியார் #Bharathiyar #பாரதிதாசன் #Bharathidasan #சிலப்பதிகாரம் #Silappathikaram #மணிமேகலை #Manimekalai #தொல்காப்பியம் #Tholkappiyam #தமிழ்ப்பண்பாடு #TamilCulture #மொழிஉணர்வு #LanguageAwareness #பேச்சுக்கலை #PublicSpeaking #மாணவர்கள்தன்னம்பிக்கை #StudentConfidence #படைப்பாற்றல் #Creativity #இளையோர்இலக்கியம் #YouthLiterature #தமிழார்வலர்கள் #TamilEnthusiasts #இலக்கியப்பயிற்சி #LiteraryTraining #மைத்திரிஅன்பு #MaithiriAnbu