நூல் அறிமுகம்: குல்லமடை!
வாழ்க்கை எளிதானதாக இல்லை. ஆனாலும் அதற்குள்ளிருக்கின்றன ஆயிரமாயிரம் தேன் கூடுகளும் நூறு நூறு வானவில்லும் உள்ளன என உணர்த்துகின்றன ஆதவன் சரவணபவனின் ‘குல்லமடை’ நூலில் இடம்பெற்றுள்ள கதைகள்.
இதில், காலத்தின் நிழலும் வாழ்வின் ஒளியும் ஒன்றையொன்று மோதிச் சமனிலை கொள்ளத் துடிக்கின்றன.
அந்தத் துடிப்பில்தான் நம்முடைய இதயம் இயங்குகிறதா என்றொரு கணம் திகைக்க வைக்கிறார் ஆதவன் சரவணபவன்.
அன்பு, காமம், போர், இடப்பெயர்வு, அகதி வாழ்க்கை, நீங்கிச் செல்லுதல், தவித்தும் தனித்தும் நிற்றல், திசையெட்டும் பரவி விரிதல், அமுதைக் காண விளைதல் என விரிந்து விரிந்து செல்லும் இந்தக் கதைத் தொகுப்பு சிறியதொரு சரித்திரத்தின் முகம்.
ஒரு நெருக்கடிக் கால நெடுந்தொலைவுப் பயணியின் வழிநெடுகச் சந்திக்கும் பல்வேறு மனிதர்களும் தோன்றும் காட்சிகளும் நிகழும் கணங்கள் பல்வேறு வாழ்க்கைச் சுவடுகளையும் அசாத்தியங்களையும் காண்பிக்கின்றன.
– தோழர். சிவராச கருணாகரன்
*****
நூல்: குல்லமடை
ஆசிரியர்: ஆதவன் சரவணபவன்
ஆதோரஸ் பதிப்பகம்
பக்கங்கள்: 137
விலை: 600/-