7 ஸ்கிரீன் ஸ்டூடியோஸ் லலித் குமார் தயாரிப்பில் நடிகர் விஜய்யின் 67-வது படமான ‘லியோ’ திரைப்படம் உருவாகி உள்ளது. லோகேஷ் கனகராஜ் இயக்கத்தில் விஜய் நடிப்பில் உருவான லியோ படத்தில் திரிஷா கதாநாயகியாக நடித்துள்ளார். 14 ஆண்டுகள் கழித்து விஜய்க்கு ஜோடியாக திரிஷா நடித்துள்ளார்.
இந்தப் படத்தின் மூலம் கில்லி, குருவி, ஆதி, திருப்பாச்சி என 4 படங்களின் வரிசையில், 5-வது முறையாக விஜய் – த்ரிஷா கூட்டணி அமைந்துள்ளது.
கௌதம் வாசுதேவ் மேனன், சஞ்சய் தத், அர்ஜுன், மன்சூர் அலிகான், ப்ரியா ஆனந்த் உள்பட பலர் நடித்திருக்கின்றனர். இந்தப் படத்துக்கு அனிருத் இசையமைக்கிறார்.
மாஸ்டர் படத்துக்கு பிறகாக விஜய், லோகேஷ் கனகராஜ், அனிருத் கூட்டணி 2-வது முறையாக ஒன்று சேர்ந்துள்ளது. கத்தி, மாஸ்டர், பீஸ்ட் படங்களைத் தொடர்ந்து 4-வது முறையாக விஜய் படத்திற்கு அனிருத் இசையமைத்துள்ளார். தற்போது வரை படத்தில் இருந்து 3 பாடல்கள் வெளியாகி இருக்கிறது.
தமிழில் மட்டுமில்லாமல் தெலுங்கு, கன்னடம், இந்தி ஆகிய மொழிகளிலும் டிரெய்லர் வெளியானது. லியோ டிரெய்லரில் விஜய் பேசிய ஆபாச வார்த்தை சர்ச்சையாகி வருகிறது.
இந்நிலையில் விஜய் பேசிய ஆபாச வார்த்தைக்கு எதிர்ப்புகள் கிளம்பிய நிலையில், டிரெய்லரில் இருந்து அந்த ஆபாச வார்த்தை நீக்கப்பட்டது.
மேலும் படத்துக்கு தணிக்கை குழு யூ/ஏ சான்றிதழ் வழங்கிய நிலையில், படத்தில் 13 திருத்தங்களை செய்யுமாறும் தணிக்கை வாரியம் உத்தரவிட்டது. அதற்கான தணிக்கை சான்றிதழும் இணையத்தில் வெளியானது.
இந்நிலையில் இத்திரைப்படம் IMAX எனப்படும் பெரிய திரை கொண்ட திரையரங்குகளிலும் வெளியாகும் என படக்குழு அதிகாரபூர்வமாக அறிவித்துள்ளது.
– தேஜேஷ்