இந்திய எல்லைப் பகுதிகளில், சீனா புதிய கிராமங்களை நவீன வசதிகளுடன் கட்டமைத்து குடியேற்றங்களை ஏற்படுத்தி வருகிறது. சீனாவின் இந்த நடவடிக்கையால் எல்லைகளில் பதற்றம் நிலவி வருகிறது.
இந்தப் பதற்றத்தை தணிக்க இந்தியா, சீனா ராணுவத் தளபதிகளுக்கிடையே இதுவரை 16 சுற்றுக்கும் மேற்பட்ட பேச்சுவார்த்தைகள் நடைபெற்றுள்ளன.
பேச்சுவார்த்தையின் போது பிரச்சினைகளுக்கு பரஸ்பரம் ஏற்றுக்கொள்ளக்கூடிய தீர்வை உருவாக்கவும் இருதரப்பும் அவ்வபோதும் ஒப்புக் கொண்டதாகவும் தெரிவிக்கப்பட்டது.
இந்நிலையில், அருணாச்சலப் பிரதேசம் தவாங் பகுதியில் சீன ராணுவத்தின் அத்துமீறலை இந்திய ராணுவம் முறியடித்துள்ளது.
300-க்கு மேற்பட்ட சீன வீரர்கள் அத்துமீற முயன்றதாகவும், அவர்களுக்கு இந்திய ராணுவம் தகுந்த பதிலடி கொடுத்ததாகவும் தகவல்கள் வெளியாகியுள்ளன.
கடந்த 9-ம் தேதி இருதரப்புக்கும் இடையே நடந்த மோதலில் இரு தரப்பிலும் சில வீரர்களுக்கு காயம் ஏற்பட்டதாகவும், மோதலுக்கு பிறகு இரு தரப்பு ராணுவத்தினரும் தங்கள் நிலைகளுக்கு திரும்பியதாகவும் கூறப்படுகிறது.